Американскиот претседател Доналд Трамп одржал итен состанок во Собата за кризи во Белата куќа, на кој со највисоките безбедносни и воени претставници разговарал за можноста за значително проширување на американските воени операции против Иран, објави „Аксиос“, повикувајќи се на извори запознаени со разговорите.
Според истите извори, администрацијата разгледува сценарија за нови напади со многу поголем обем од досегашните операции во областа на Ормускиот теснец. Наводно, целта е да се зголеми притисокот врз Техеран за повторно отворање на теснецот и прифаќање на американските барања поврзани со иранската нуклеарна програма.
Состанокот бил свикан откако американските сили четврти ден по ред изведувале напади долж јужниот брег на Иран и во областа на Ормускиот теснец. Според американски претставници, цел на операциите биле системи за противвоздушна одбрана, радари, позиции за противбродски ракети и локации од кои се лансираат беспилотни летала.
Вашингтон тврди дека овие акции имаат за цел значително да ја намалат способноста на Иран да извршува напади врз бродовите што минуваат низ Ормускиот теснец.
Во меѓувреме, Иран возвратил со нови ракетни и беспилотни напади врз американски воени бази во Јордан, Кувајт и Бахреин. Во вторникот попладне, според извештаите, стапила во сила и американската поморска блокада на иранските пристаништа.
На состанокот во Белата куќа, покрај Трамп, присуствувале потпретседателот Џ.Д. Венс, државниот секретар Марко Рубио, секретарот за одбрана Пит Хегсет, претседателот на Здружениот штаб на вооружените сили генерал Ден Кејн, директорот на ЦИА Џон Ратклиф, специјалниот претставник Стив Виткоф и други високи американски функционери.
Изворите наведуваат дека главна тема биле плановите за можни нови удари врз стратешки цели во Иран, додека Белата куќа засега одбива официјално да ги коментира овие информации.
…
