Грција на 24 јули официјално ќе го пушти во сообраќај последниот дел од автопатот А3, познат како Централногрчки автопат Е65, со што целосно ќе биде завршена една од најголемите инфраструктурни инвестиции во земјата.
Со отворањето на последните 46 километри, целата траса со должина од 182,1 километар ќе биде ставена во функција. Свеченото пуштање е најавено за 23 јули, а новиот автопат треба значително да ја подобри транспортната поврзаност во централна и западна Грција.
Автопатот Е65 ќе го поврзе пристаништето Игуменица со пристаништето Волос, а преку постојната мрежа ќе овозможи побрза врска и со пристаништето Пиреја. Со тоа, Грција создава нов транспортен коридор кој ги поврзува трите стратешки пристаништа и ја зајакнува нејзината позиција во европските транспортни мрежи.
Според проценките, патувањето од Пиреја кон Западен Балкан ќе се скрати за околу два часа, што ќе има значајно влијание врз товарниот транспорт, трговијата и туризмот.
Проектот вреден околу 1,4 милијарди евра вклучува 16 клучки, пет двојни тунели, меѓу кои и тунелот Отрис долг речиси три километри, 31 мост подолг од 50 метри, повеќе од 100 надвозници и подвозници, како и центри за одмор и наплата на патарина.
Новата автопатска делница ќе го замени дел од старата и опасна патна инфраструктура и ќе донесе подобра поврзаност за регионите Западна Македонија, Тесалија, Епир и Централна Грција.
Изградбата на Е65 беше еден од најдолгите инфраструктурни предизвици во современата грчка историја. Работите започнаа во 2007 година, но беа прекинати во периодот на економската криза. Проектот повторно беше активиран по 2013 година, по долгогодишни преговори со банките, Европската комисија и грчката држава.
Компанијата ТЕРНА, дел од групацијата GEK TERNA, го презеде најголемиот дел од изградбата и продолжи со работите и во најтешките години за грчката економија.
Со целосното пуштање во употреба, Е65 станува една од клучните патни артерии што ја поврзуваат Грција со европските транспортни коридори и Западен Балкан.
..
