Управата за јавни приходи (УЈП) ги повика граѓаните кои започнале, но не ја завршиле регистрацијата во системот е-Даночни услуги (Е-ППД), да ја комплетираат постапката за да можат непречено да ги користат електронските услуги.
Според УЈП, по извршените проверки е утврдено дека повеќе од 35.000 граѓани поднеле барање за регистрација на кориснички профил како физички лица, но процесот останал незавршен.
За таа цел, до овие граѓани се испратени персонализирани известувања преку електронската адреса info@ujp.gov.mk, со упатства за следните чекори.
Од Управата апелираат сите кои добиле вакво известување да се јават во надлежната канцеларија на УЈП со важечки документ за идентификација, каде овластено службено лице ќе ја одобри и финализира нивната регистрација.
Активниот кориснички профил во системот е-Даночни услуги овозможува користење на електронските услуги на државниот портал, увид во Годишната даночна пријава за данок на личен доход, поднесување барања за уверенија за остварен доход, како и користење на апликацијата МојДДВ за скенирање фискални сметки и остварување на правото за поврат на дел од ДДВ.
За дополнителни информации, граѓаните можат да се обратат на електронската адреса info@ujp.gov.mk или на телефонските броеви 02/3253-200 и 0800 33 000 (достапен од фиксна телефонска мрежа).
