Дваесет и петгодишен жител на тетовското село Требош е лишен од слобода, откако управувал автомобил без возачка дозвола и предизвикал сообраќајна несреќа на регионалниот пат кон селото.
Сообраќајката се случила вчеравечер, околу 22 часот, а во неа учествувале патничко возило „голф“, управувано од С.Г. (25) од селото Требош, и патничко возило „мерцедес“, зад чиј волан бил Т.С. (80) од селото Палатица.
Според информациите од СВР Тетово, С.Г. го управувал возилото без положен возачки испит, односно без возачка дозвола. Со тоа сторил кривично дело по член 297-а од Кривичниот законик, поради што веднаш бил лишен од слобода.
Во несреќата со тешки телесни повреди се здобиле сопатничките во „мерцедесот“ – Р.С. (77) од Палатица и С.И. (49) од Тетово.
Телесни повреди добиле и В.И. (46), како и тригодишно дете. Сите повреди биле констатирани во Клиничката болница во Тетово.
Увид на местото на сообраќајната несреќа извршила екипа на СВР Тетово, а по целосното документирање на случајот против С.Г. ќе биде поднесена соодветна кривична пријава.
