Неверојатен случај на кражба повторно го привлече вниманието на јавноста во Италија, откако 350 лежалки украдени од рекреативен клуб во Реџо Емилија беа пронајдени на плажа во Албанија. Иако сега е познато каде се наоѓаат, нивното враќање засега изгледа речиси невозможно.
Станува збор за лежалки кои во јуни 2024 година исчезнале преку ноќ од рекреативниот клуб „Онде Кјаре“ (Onde Chiare) во Реџо Емилија. Вкупната вредност на украдената опрема се проценува на околу 45.000 евра, а и покрај истрагата, со месеци немало никаква трага што се случило со нив.
Пресвртот дошол сосема случајно во август 2025 година, кога италијанска туристка, престојувајќи на плажата Кејп Родони во близина на Драч, ги забележала лежалките и ги препознала по натписот на клубот. Таа веднаш ги известила сопствениците, со што конечно била решена мистеријата за нивното исчезнување.
Случајот повторно стана актуелен деновиве, откако клубот на својата официјална Фејсбук страница објави видео со лежалките и на шеговит начин им се обрати на своите следбеници.
„Ако некој оди на одмор во Кејп Родони, поздравете ги нашите лежалки“, напишаа од клубот.
Сопственикот на клубот, Енрико Кавацони, вели дека и покрај тоа што точно знаат каде се наоѓа украдената опрема, по две години сè уште немаат начин да ја вратат.
„Знаеме каде се лежалките, но и по две години сè уште не можеме да најдеме начин да ги вратиме“, изјавил Кавацони.
Необичната приказна предизвика бројни реакции на социјалните мрежи, каде многумина со неверување коментираат како стотици лежалки можеле да бидат пренесени од Италија до Албанија без никој да го забележи тоа.
