Министерството за образование и наука (МОН) го распиша конкурсот за прием на студенти во државните и приватните студентски домови за академската 2026/2027 година. На располагање се вкупно 3.498 легла, а висината на партиципацијата ќе зависи од категоријата на студентскиот дом.
Според конкурсот, 699 легла се резервирани за идните бруцоши, односно студентите кои првпат ќе се запишат на факултет, додека преостанатите 2.799 места се наменети за студентите од втора до шеста година на студии, како и за апсолвентите.
Најголем сместувачки капацитет и годинава има студентскиот дом „Гоце Делчев“ во Скопје со 1.216 легла, додека во целосно реконструираниот дел од домот „Стив Наумов“ се обезбедени 1.014 места.
„Стив Наумов“ е категоризиран како студентски дом од Тип 1, односно реконструиран и енергетски ефикасен објект со повисок стандард на сместување. Вкупната цена за сместување и исхрана изнесува 11.000 денари месечно, при што Министерството ќе субвенционира 4.400 денари, а студентите ќе плаќаат 6.600 денари.
За домовите од Тип 2 е утврдена вкупна цена од 6.820 денари месечно. Во овој случај, Министерството ќе покрива 3.410 денари, а ист износ ќе доплаќа и студентот. Иста државна субвенција од 3.410 денари е предвидена и за студентите кои ќе бидат сместени во приватните студентски домови со кои МОН има склучено договор.
Покрај домовите „Гоце Делчев“ и „Стив Наумов“ во Скопје, конкурсот ги опфаќа и студентскиот дом „Кочо Рацин“ во Битола, студентскиот дом во Тетово, како и приватните студентски домови „Хилјадников“ и „Логос“ во Штип.
Поради реконструкцијата на студентскиот дом „Никола Карев“, студентите во Охрид ќе бидат сместувани во одморалиштето на Министерството за внатрешни работи, додека студентите кои претходно престојуваа во домот „Браќа Миладиновци“ во Штип ќе бидат сместени во поранешниот приватен студентски дом „ОАЗА“.
Студентите од втора и повисоките години ќе можат електронски да ги поднесуваат своите апликации најдоцна до 31 јули, додека рокот за пријавување на бруцошите е од 14 до 20 септември.
Од Министерството потсетуваат дека секој студент има право да конкурира само за еден студентски дом, а нецелосните и некомплетни апликации нема да бидат земени предвид при рангирањето.
Согласно конкурсот, 40 проценти од вкупниот број легла се резервирани за студенти од семејства со пониски приходи и други ранливи категории, 25 проценти се наменети за студенти со особено висок успех, додека преостанатите 35 проценти ќе бидат распределени на останатите редовни студенти кои ги исполнуваат условите од конкурсот.
