Американскиот претседател Доналд Трамп упати остри критики кон Велика Британија, нарекувајќи ја „сиромашна земја-катастрофа“ и повика на итно зголемување на експлоатацијата на нафта во Северното Море.
Во објава на социјалните мрежи, Трамп оцени дека Обединетото Кралство располага со огромно природно богатство кое, според него, не е доволно искористено.
„Абердин и цела Шкотска ќе го прослават отворањето на нафтените резерви во Северното Море. Тоа е огромен ресурс што може да го направи Обединетото Кралство една од најбогатите земји во светот. Време е да се отклучи потенцијалот на земјата. Те сакаме, Шкотска!“, напиша Трамп.
Тој истовремено ја критикуваше британската енергетска политика, тврдејќи дека земјата сама се лишува од значителни приходи и економски раст со ограничувањето на новите проекти за експлоатација на нафта и гас.
Изјавата доаѓа во период кога во Велика Британија се води жестока дебата околу иднината на производството на фосилни горива. Владата најавува забрзана транзиција кон обновливи извори на енергија, додека дел од политичарите и индустријата предупредуваат дека ограничувањето на домашното производство може да ја зголеми зависноста од увоз на енергенси.
Коментарите на Трамп предизвикаа бројни реакции на социјалните мрежи и во политичките кругови, особено поради неговата оценка дека Велика Британија е „сиромашна земја-катастрофа“ и повикот за поагресивна експлоатација на нафтените резерви во Северното Море.
