Основното јавно обвинителство Гостивар отвори истрага против директорката на Јавното претпријатие „Комуналец“ и двајца раководители на сектори, за кои е побаран 30-дневен притвор поради сомнение за тешки дела против животната средина и природата.
Според Обвинителството, тројцата осомничени се товарат дека дале налог за поставување пумпи со кои непречистена вода од надворешен канал била внесувана во системот за водоснабдување, со цел да се зголеми притисокот во мрежата за Гостивар и околните населени места.
Како што беше соопштено на прес-конференција, анализите на Институтот за јавно здравје покажале присуство на колиформни и фекални бактерии во примероците од каналот и преливната станица. Во внатрешноста на каптажата биле пронајдени 39 колиформни бактерии, иако дозволената вредност според стандардите е нула.
Од Обвинителството информираа дека водата кај крајните корисници не покажала присуство на бактерии, но било регистрирано зголемено ниво на хлор над дозволените граници.
За делото за кое се товарат осомничените е предвидена затворска казна од најмалку четири години. Истражната постапка е во почетна фаза, а допрва ќе се утврдува евентуалната причинско-последична врска меѓу состојбата со водата и заболувањата кај граѓаните.
Од Обвинителството посочија дека доколку се обезбедат дополнителни докази, истрагата може да биде проширена и кон други лица или институции кои имале надлежности поврзани со контролата и безбедноста на водоснабдувањето.
Постапката започнала по анонимна пријава доставена до полицијата, а надлежните институции продолжуваат со проверки за целосно расчистување на случајот.
….
