Денеска се навршуваат 63 години од катастрофалниот земјотрес што на 26 јули 1963 година го погоди Скопје и засекогаш ја промени историјата на градот.
Кобното утро, точно во 5 часот и 17 минути, силен земјотрес го разбуди Скопје. Потресот бил со јачина од 6,1 степени според Рихтеровата скала и со интензитет од 9 степени според Меркалиевата скала.
Главниот удар траел околу 20 секунди, но бил доволен за да предизвика огромни човечки жртви и материјални разурнувања. По него следувале и дополнителни, послаби потреси, кои биле регистрирани до 5 часот и 43 минути.
Според податоците на службите задолжени за идентификација на жртвите, под урнатините животот го загубиле 1.070 граѓани. Меѓу нив имало 478 мажи, 430 жени и 162 деца.
Сепак, овие бројки не биле сметани за целосно конечни, бидејќи постоела можност дел од загинатите да биле погребани од своите семејства пред да бидат официјално евидентирани од надлежните служби.
Катастрофата оставила зад себе и илјадници повредени. Вкупно 2.900 лица биле повредени, од кои 1.110 се здобиле со тешки повреди.
Повеќе од 300 повредени останале на лекување во болниците и клиниките и до месец и половина по земјотресот, додека околу 800 лица останале со траен инвалидитет.
Огромни биле и материјалните последици.
Во земјотресот биле целосно урнати 15.800 станови, додека дополнителни 28.000 биле оштетени. Голем дел од Скопје за само неколку секунди бил претворен во урнатини, а илјадници семејства останале без своите домови.
Снимките и фотографиите направени непосредно по катастрофата и денес сведочат за размерите на трагедијата – разрушени згради, улици затрупани со урнатини и град кој преку ноќ останал без голем дел од својата дотогашна архитектура.
Скопскиот земјотрес од 1963 година останува една од најтешките природни катастрофи во историјата на Скопје и Македонија.
Шеесет и три години подоцна, 26 јули останува ден на сеќавање на 1.070-те жртви и на трагедијата што за само 20 секунди засекогаш го промени Скопје.
Видео: Universal International News / davorstojkoski / YouTube
