Петмина планинари од Босна и Херцеговина загинаа на Елбрус, додека двајца членови на седумчлената експедиција успеале да преживеат и се евакуирани, објавија медиумите повикувајќи се на најновите информации од руските служби.
Руското Министерство за вонредни ситуации (МЧС) објави видеоснимка од спасувачката операција, на која се гледаат исклучително тешките временски услови со кои се соочуваат спасувачките екипи на највисокиот врв во Европа.
Според руската државна агенција РИА Новости, која се повикува на Главната управа на Министерството за вонредни ситуации за Кабардино-Балкарија, телата на загинатите планинари засега не можат да бидат евакуирани поради екстремно неповолните временски услови.
„Телата на планинарите се наоѓаат на таканареченото седло на планината Елбрус, на надморска височина од 5.350 метри. Нивната евакуација ќе биде извршена кога временските услови ќе го дозволат тоа“, соопштиле од руското Министерство за вонредни ситуации.
Објавената видеоснимка дополнително покажува колку се сурови и непристапни условите на теренот и зошто во моментов извлекувањето е исклучително тешко.
Од руското Министерство потврдиле дека двајцата преживеани планинари веќе се евакуирани од планината и предадени на медицински екипи за понатамошно згрижување.
Драмата започнала во саботата, на 25 јули, кога седумчлената група планинари останала заробена за време на искачувањето на Елбрус. Временските услови нагло се влошиле, по што групата испратила повик за помош.
Спасувачките служби потоа започнале операција во исклучително тешки услови на голема надморска височина.
Според најновите информации што ги пренесуваат регионалните медиуми, од седумтемина членови на експедицијата петмина го загубиле животот, а двајца преживеале.
Меѓу загинатите имало и искусни планинари кои претходно освојувале различни планински врвови, но и членови на групата кои претходно немале искуство со искачување на толку големи надморски височини.
Елбрус се наоѓа во Кавказ, а неговиот западен врв достигнува 5.642 метри надморска височина и се смета за највисок врв во Европа.
Спасувачките служби ја следат состојбата на планината, а извлекувањето на телата ќе започне дури кога силниот ветер, слабата видливост и останатите временски услови ќе овозможат безбедна операција.
