Германија планира од 1 јануари 2027 година значително да го намали бројот на работници од земјите од Западен Балкан кои можат да добијат работна дозвола. Годишната квота, според најавите, ќе биде намалена од досегашните 50.000 на 25.000 работници.
Промената е дел од пакетот реформи подготвен од ЦДУ/ЦСУ и СПД, а планот за намалување на квотата беше најавен уште минатата година, по склучувањето на коалицискиот договор.
Правилото за Западен Балкан им овозможува на граѓаните на Србија, Босна и Херцеговина, Црна Гора, Македонија, Албанија и Косово да се вработат во Германија доколку имаат обезбеден договор за работа.
Програмата опфаќа голем број професии, вклучително и работни места за кои не се бара формална квалификација. Кај регулираните професии, како медицината, потребно е претходно признавање на професионалните квалификации.
Градежниците предупредуваат на сериозни последици
Германската градежна индустрија остро се спротивставува на намалувањето на квотата, предупредувајќи дека тоа може да предизвика дополнителен недостиг на работници и да го забави реализирањето на инфраструктурни проекти.
Од Централното здружение на германската градежна индустрија (ZDB) посочуваат дека околу 30 отсто од визите издадени преку програмата се поврзани со градежниот сектор.
Според нивните проценки, доколку квотата биде преполовена, градежната индустрија би можела да остане без околу 8.000 работници до крајот на годината.
Од здружението нагласуваат дека странските работници претставуваат значаен дел од германската градежна работна сила и дека Правилото за Западен Балкан е еден од најефикасните механизми за привлекување кадар од земји надвор од Европската Унија.
Голем интерес од земјите од Западен Балкан
Интересот за работа во Германија преку оваа програма останува исклучително висок. Квотата за 2025 година била исполнета уште на крајот на ноември, поради што дел од поднесените барања не можеле да бидат одобрени.
Бројот на издадени одобренија, сепак, бил значително поголем од официјалната квота. Федералната агенција за вработување минатата година издала околу 105.000 одобренија.
Причината е долгото чекање за виза – едно одобрение не значи автоматски дека работникот веднаш пристигнува во Германија.
Податоците на Институтот за истражување на пазарот на трудот и занимањата (IAB) покажуваат дека дури 98 отсто од лицата кои пристигнале во Германија преку програмата успеале да најдат работа.
Околу 58 отсто од нив работат како квалификувани работници, специјалисти или експерти, иако за користење на Правилото за Западен Балкан не е задолжително поседување на таква квалификација.
Германската влада намалувањето го поврзува со растот на невработеноста во земјата. Градежниот сектор, од друга страна, бара актуелната квота од најмалку 50.000 работници годишно да остане непроменета.
ZDB бара и забрзување и дигитализација на постапката за издавање визи, како и разгледување можност програмата да се прошири и со работници од други земји.
Од германската градежна индустрија посочуваат дека програмата првенствено е наменета за обезбедување работна сила и потсетуваат дека Правилото за Западен Балкан беше воведено од ЦДУ/ЦСУ и СПД во 2016 година.
…
