По повеќекратни лабораториски испитувања на водата од градскиот водовод во Гостивар, надлежните соопштија први охрабрувачки вести за граѓаните.
Водата од чешмите од денеска може да се користи како техничка вода – односно за капење, туширање, миење садови, алишта и одржување на хигиената во домаќинствата, но сè уште НЕ е безбедна за пиење, ниту за подготовка на храна.
Ова на денешната прес-конференција го соопшти министерот за внатрешни работи Панче Тошковски, кој посочи дека одлуката е донесена врз основа на последните анализи спроведени од експертските тимови на ЈП „Водовод и канализација“ – Скопје.
Како што беше најавено претходно, целта беше прво да се обезбеди вода за техничка употреба преку хиперхлорирање на системот, а потоа и за пиење.
„Првично ќе треба да се направи хиперхлорирање на водоводниот систем, со цел најнапред да се обезбеди вода за техничка употреба, а потоа и за пиење“, изјави Тошковски при посетата на Гостивар.
Министерот нагласи дека и покрај овој чекор напред, кризната состојба останува во сила и ќе се продолжи со обезбедување флаширана вода за пиење за сите граѓани на Гостивар, се додека анализите целосно не потврдат дека водата е безбедна и за консумирање.
Надлежните апелираат граѓаните строго да ги почитуваат препораките на Агенцијата за храна и ветеринарство (АХВ) и во никој случај да не ја користат водата од чешма за пиење, готвење или миење овошје и зеленчук.
Институциите најавија дека ќе продолжат со континуирано земање мостри и тестирање од повеќе точки на водоводната мрежа, а јавноста ќе биде навремено информирана за секоја нова промена.
…
