Претседателот на ФИФА, Џани Инфантино, наводно разгледува план за привлекување приватни инвеститори преку продажба на удели поврзани со Светското првенство, објави „Фајненшл тајмс“.
Според информациите, ФИФА би можела да основа нова компанија која би управувала со комерцијалните права и организациските аспекти на најголемиот фудбалски турнир во светот. Потенцијалната вредност на овој договор се проценува на околу 15 милијарди фунти, односно близу 20 милијарди долари.
Наводниот план предизвика силни реакции во фудбалските кругови, а некои претставници го опишаа како „нуклеарен удар“ врз традиционалниот модел на функционирање на фудбалот.
Според медиумските наводи, во подготовката на финансиската структура била вклучена и американската банкарска групација „Џеј Пи Морган“, додека администрацијата на американскиот претседател Доналд Трамп наводно била запознаена со плановите.
Во предложениот модел, 211-те членки на ФИФА би можеле да добијат одредени удели, светската фудбалска организација би го задржала мнозинството, а приватните инвеститори би имале можност да купат помали удели вредни милијарди.
Планот, доколку биде реализиран, би можел да предизвика големи промени во начинот на кој се организира Светското првенство. Дел од фудбалските функционери стравуваат дека приватните инвеститори би можеле да бараат проширување на турнирот или промени во неговиот традиционален четиригодишен циклус.
Сепак, официјален договор сè уште не е потпишан, а ФИФА не ги потврди овие наводи.
Инфантино во последниот период се соочува со критики за своето раководење со организацијата, по што јавно ги отфрли обвинувањата и ги обвини критичарите за ширење, како што наведе, „лажни гласини“.
…
