По повод 2 Август – Илинден, Денот на Републиката, Државниот архив објави избор на историски фотографии и архивски документи од своите фондови и збирки, кои сведочат за борбата, идеалите и жртвата на илинденците.
Објавените материјали претставуваат вредно историско сведоштво за еден од најзначајните настани во македонската историја – Илинденското востание од 1903 година, како и за стремежот на македонскиот народ кон слобода и сопствена држава.
„На денешен ден 1903 година започна Илинденското востание, еден од најзначајните настани во македонската историја. Водени од идеалите за слобода и сопствена држава, македонските револуционери ја започнаа борбата која остави траен белег во колективната меморија на нашиот народ. Крушевската Република остана најсилен симбол на стремежот кон слобода, еднаквост и праведно општество. Нека е честит Илинден! Вечна слава на хероите на Илинденското востание!“, порачаа од Државниот архив.
Меѓу објавените архивски материјали се наоѓаат фотографии од Крушево, оригинални документи поврзани со Илинденското востание, како и фотографии од македонските револуционери кои учествувале во борбата против Османлиската Империја.
Од Државниот архив истакнуваат дека со оваа објава сакаат да придонесат за зачувување на историската меморија и да ја доближат богатата архивска граѓа до јавноста, особено до помладите генерации.
Годинава се одбележуваат 123 години од Илинденското востание – историски настан кој, заедно со Првото заседание на АСНОМ во 1944 година, претставува еден од темелите на современата македонска државност.
