Во раните утрински часови, околу 5:15 часот, припадници на Територијалната противпожарна единица (ТППЕ) Струмица успешно спроведоа спасувачка акција, откако мајка и дете паднале во провалија покрај трим-патеката што води кон манастирот „Св. Илија“.
По пристигнувањето на местото на настанот, пожарникарите-спасители со употреба на специјализирана спасувачка опрема безбедно ги извлекле двете лица од непристапниот терен.
По спасувањето, мајката и детето биле предадени на екипа на Итната медицинска помош, која ги презела за понатамошен лекарски преглед и згрижување.
Од ТППЕ Струмица информираат дека благодарение на брзата, професионална и добро координирана интервенција, спасувачката акција завршила успешно.
Воедно, тие упатија апел до граѓаните кои ги користат трим-патеките и планинските патеки да се движат внимателно, особено во раните утрински и ноќните часови, кога движењето по стрмни и непристапни делови од теренот носи зголемен ризик.
„ТППЕ Струмица – секогаш подготвени да помогнеме и да спасуваме човечки животи“, порачаа од противпожарната единица.
