Пожарите во Грција продолжуваат да предизвикуваат сериозни проблеми, а најкритична останува состојбата во западниот дел на Атика, каде што огнената стихија трет ден по ред се шири кон населените места.
Пламените јазици веќе ја зафатија областа Агија Скепи, додека пожарникарите вложуваат максимални напори за да го спречат ширењето на огнот кон Псата. Во акцијата се вклучени околу 450 пожарникари, потпомогнати од седум противпожарни авиони, а службите остануваат во состојба на висока готовност поради екстремниот ризик од нови пожари.
Во регионите Атика, Беотија и Евија и натаму е во сила портокалово предупредување за опасност од пожари. Високите температури и силниот ветер значително ја отежнуваат борбата со огнената стихија.
Според првичните проценки, пожарите во Атика и Беотија уништиле повеќе од 111.000 хектари шуми и земјоделски површини, оставајќи зад себе огромни материјални штети.
Во меѓувреме, грчките власти ја продолжуваат истрагата за трагичната несреќа што се случи за време на гаснењето на пожарот во областа Псата, кога се судрија два изнајмени противпожарни хеликоптери од типот „Бел“. Во судирот загинаа дански пилот и грчки координатор, додека британски пилот и неговиот грчки колега беа повредени.
По наредба на обвинителството, полицијата собира докази за да ги утврди причините за несреќата.
Грција годинава се соочува со една од најтешките противпожарни сезони во последните години, а временските услови и понатаму претставуваат сериозен предизвик за службите кои се борат со пожарите.
…
