Тешка сообраќајна несреќа се случи утрово на магистралниот пат А3 Битола – Прилеп, во близина на мостот на реката Шемница, каде во верижен судир учествувале четири возила.
Поради несреќата, сообраќајот на оваа делница е целосно прекинат од 09:00 часот, а на местото веднаш пристигнале екипи на СВР Битола, Територијалната противпожарна единица Битола и Итната медицинска помош.
Во тешката несреќа повредени се осум лица, кои со сериозни телесни повреди биле пренесени во Клиничката болница во Битола. Едно лице поради тежината на повредите веднаш било однесено на операција, додека шест пациенти се задржани на Одделението за хирургија, а двајца се хоспитализирани на Одделението за ортопедија.
Според лекарските информации, освен лицето кое е оперирано, останатите повредени се во стабилна состојба, но се под постојан медицински надзор.
Од ТППЕ Битола информираат дека и покрај силниот удар меѓу возилата, немало избувнување на пожар.
Патниот правец Битола – Прилеп останува затворен за сообраќај во двата правци. На местото се врши увид од полициски екипи на СВР Битола и надлежен јавен обвинител, по што ќе бидат познати причините и околностите за несреќата.
…
