Американскиот претседател Доналд Трамп ги отфрли медиумските тврдења дека американската армија се соочува со недостиг на оружје и муниција, нагласувајќи дека САД располагаат со големи резерви и дека производството дополнително се зголемува.
Во објава на својата социјална мрежа „Трут Соушл“, Трамп порача дека Соединетите Американски Држави имаат „огромни количини муниција, особено од одредени видови“, додавајќи дека нови количества постојано се произведуваат и се испорачуваат во согласност со потребите на вооружените сили. Тој истакна и дека американската одбранбена индустрија гради рекорден број нови фабрики и производствени капацитети.
Трамп остро ги осуди лицата кои, според него, доставуваат доверливи информации до медиумите, оценувајќи ги нивните постапки како предавство.
„Се трага по оние што оддаваат предавнички информации“, напиша Трамп, додавајќи дека за одговорните ќе бидат побарани долготрајни затворски казни.
Неговата реакција следува по напис на „Вашингтон пост“, во кој се тврди дека Трамп приватно го критикувал американскиот министер за одбрана Пит Хегсет поради исцрпувањето на залихите на клучна муниција, што наводно ги ограничило воените опции на Вашингтон во конфликтот со Иран.
Според весникот, на состанок на кабинетот Трамп побарал објаснување од Хегсет зошто проблемот со залихите не бил решен, иако верувал дека тоа веќе е направено. Изворите на „Вашингтон пост“ наведуваат дека недостигот најмногу се однесувал на наведувани ракети со долг дострел и ракети за противвоздушна одбрана, поради што американскиот претседател во последните денови се откажал од нови поголеми воени напади врз Иран.
Белата куќа засега не соопшти дополнителни детали во врска со овие тврдења.
…
