Православните верници во недела, 9 август, го одбележуваат празникот посветен на Светиот великомаченик Пантелејмон, светец кој во христијанската традиција се почитува како исцелител и заштитник на болните, но и како покровител на патниците.
Според црковното предание, Свети Пантелејмон бил роден во Никомидија, од татко незнабожец Евсторгиј и мајка христијанка Евула. Уште од младост ја изучувал лекарската вештина, а подоцна го примил христијанството и целосно му се посветил на помагањето на луѓето.
Се верува дека Бог му дал посебна благодат за исцелување, па тој лекувал болни не само со своето медицинско знаење, туку и со молитва. Едно од најпознатите преданија зборува за исцелување на слеп човек, кого претходно лекарите не успеале да му помогнат.
Неговата вера и делата предизвикале завист кај други лекари, поради што бил обвинет дека е христијанин. Поради својата вера бил подложен на тешки маки, но не се откажал од христијанството.
Според преданието, Свети Пантелејмон пострадал во 304 година. Пред да биде погубен, клекнал и се помолил под маслиново дрво, по што му била отсечена главата. Во христијанската традиција се верува дека неговата духовна сила продолжила да делува преку неговите мошти.
Празникот е проследен и со бројни народни верувања. Се смета дека денот е погоден за започнување нова работа или бизнис, бидејќи се верува дека започнатото на Свети Пантелејмон може да биде проследено со успех.
Посебно место има и верувањето поврзано со патувањата. Свети Пантелејмон се смета за заштитник на патниците и на луѓето кои често се на пат, па според народното верување, овој ден се смета за погоден за тргнување на пат.
Постои и необичен народен обичај поврзан со оние кои го празнуваат Свети Пантелејмон како куќна слава. Доколку во црква се сретнат две непознати лица кои го слават истиот светец, според верувањето треба да си честитаат и да се прегрнат, бидејќи се смета дека на некој начин се духовно или крвно поврзани.
Свети Пантелејмон така останува еден од празниците со силна духовна традиција, но и со бројни народни верувања кои со генерации се пренесуваат меѓу верниците.
…
