Пратеникот Антонио Милошоски обвини дека преку анонимни профили на социјалните мрежи се води, како што вели, координирана кампања со која кај граѓаните се создава страв и сомнеж во исправноста на водата за пиење во Скопје.
„Политички мотивирана група, сокриена позади анонимни профили, цел ден со усогласен настап по социјалните мрежи ги плаши граѓаните по однос на исправноста на водата за пиење во Скопје“, напиша Милошоски.
Според него, станува збор за организирано ширење паника и дезинформации со цел да се предизвикаат страв и вознемиреност кај населението, но и да се намали довербата во институциите.
Милошоски направи споредба со случувањата во периодот на „Диво Насеље“, посочувајќи дека и тогаш, според него, биле пласирани информации кои предизвикале несигурност и страв кај граѓаните.
„Нешто слично се случуваше за време на ‘Диво Насеље’, кога еден т.н. доајен на новинарството ја пласираше дезинформацијата дека следува девалвација на денарот, која создаде несигурност, страв и политичка штета, иако никогаш не се случи“, наведува Милошоски.
Неговата реакција следува по зголемената активност на социјалните мрежи во однос на квалитетот и безбедноста на водата за пиење во Скопје.
…
