Иран испрати остри пораки до САД, повикувајќи го Вашингтон да го признае, како што велат од Техеран, поразот во конфликтот, додека истовремено останува блокиран сообраќајот низ стратешкиот Хормуски теснец.
Иранскиот заменик-министер за надворешни работи Казем Харибабади порача дека теснецот ќе се отвора и затвора само по одлука на Иран. Тој ги повика САД да ја прифатат „реалноста на поразот“ и да се откажат од, како што ги нарече, фантазиите.
Министерот за надворешни работи Абас Арагчи изјави дека Техеран сè уште нема донесено одлука за продолжување на разговорите со Вашингтон. Според него, САД мора да исполнат одредени услови за повторно да биде овозможен нормален транспорт низ теснецот.
Хормускиот теснец е од клучно значење за глобалниот енергетски пазар, бидејќи пред почетокот на војната низ него минувала околу една петтина од светската нафта.
Во меѓувреме, американскиот претседател Доналд Трамп ги повика Американците да се подготват за повисоки цени на горивото. Тој порача дека плаќањето „малку повеќе за бензин“ е прифатлива цена доколку тоа придонесе Иран да не може да развие нуклеарно оружје.
Просечната цена на галон бензин во САД во петокот достигна околу 4,08 долари, што претставува зголемување од 29 проценти во однос на истиот период минатата година.
Трамп и американскиот министер за финансии Скот Бесент најавија и дополнителен финансиски притисок врз Иран. Бесент соопшти дека нови мерки против Техеран би можеле да бидат објавени следната седмица.
Состојбата во Хормускиот теснец останува исклучително напната. Според податоците на компанијата за следење на бродови „Kpler“, во петокот низ теснецот поминале само два брода, додека пред војната дневно минувале околу 130.
Некои бродови продолжуваат да пловат со исклучени транспондери, но оние кои минуваат без дозвола од Иран се изложени на ризик од ракетни и беспилотни напади.
Дополнително се зголемија стравувањата од проширување на конфликтот во регионот. Во Јемен, Хутите, кои се сојузници на Иран, повторно извршија напади. Јеменските власти соопштија дека кон пристаништето Моча биле истрелани шест балистички ракети, при што загинале четири цивили.
Во исто време, Хутите соопштија дека со беспилотно летало бил нападнат објект на саудискиот нафтен гигант „Aramco“ во градот Наџран.
Сето ова дополнително ги намалува шансите за брзо обновување на мировните преговори и ја зголемува неизвесноста на глобалниот енергетски пазар.
…
