„Македонска пошта“ ќе го засили својот возен парк со 100 нови возила, во рамки на владина мерка за модернизација на јавниот поштенски сервис, чија цел е подобра организација на доставата и поголема оперативна ефикасност низ целата држава.
Според информациите од компанијата, набавени се вкупно 90 пикап возила и 10 комбиња, кои ќе се користат за распределба и транспорт на пратки. Од раководството посочуваат дека недостигот на возила досега претставувал сериозен проблем во секојдневното функционирање, но со оваа инвестиција се очекува значително олеснување на работата на терен.
Директорот на „Македонска пошта“ Охран Куртеши изјави дека компанијата се соочувала со голем број предизвици, меѓу кои и застарен возен парк и ограничени логистички капацитети, што директно влијаело врз брзината и квалитетот на услугите. Тој нагласи дека новата опрема ќе придонесе за поефикасна дистрибуција на пратките и подобра организација на поштенските служби.
Во исто време, од раководството се посочува дека во изминатиот период се работи и на финансиска консолидација на претпријатието, преку намалување на трошоците и зголемување на приходите. Како дел од тие мерки е наведено и редуцирање на административниот кадар, како и реорганизација на подружниците.
Куртеши наведе дека бил затекнат значителен процент административен персонал и дека се спроведуваат промени со цел оптимизација на структурата и поголема ефикасност во работењето. Дополнително, се работи и на расчистување на заостанати пратки, при што беше посочено дека големи количини пратки кои претходно стоеле во магацин биле обработени во краток рок.
Министерот за транспорт и врски Александар Николоски информираше дека вкупната вредност на набавката изнесува 104 милиони денари, при што преку јавна постапка е постигната значителна заштеда во однос на првично планираните средства. Тој додаде дека со новата опрема ќе се овозможи поштенските пратки да стигнуваат и до најоддалечените населени места.
Премиерот Христијан Мицкоски оцени дека со оваа инвестиција започнува нова фаза на зајакнување на институцијата, која, како што рече, со години се соочувала со недостиг од системски решенија и модернизација.
Според него, просечната старост на возилата кои досега се користеле била околу 15 години, што создавало зголемени трошоци, дефекти и доцнења во испораката. Тој нагласи дека целта на ваквите мерки е подобрување на јавните услуги и враќање на довербата на граѓаните.
Возилата се обезбедени како донација од Владата и Министерството за транспорт и врски, како дел од поширока програма за унапредување на поштенската инфраструктура.
