Цените на суровата нафта продолжуваат да растат на светските берзи, при што цената на нафтата од типот „Брент“ утрово надмина 91 долар за барел.
„Брент“ поскапе за 0,82 отсто и се тргуваше по 91,746 долари за барел, додека американската WTI нафта забележа раст од 0,88 отсто, достигнувајќи 85,646 долари за барел.
На финансиските пазари вниманието на инвеститорите е насочено кон претстојните податоци за инфлацијата во еврозоната, како и кон записникот од последниот состанок на американските Федерални резерви, кој би можел да даде дополнителни сигнали за идното движење на каматните стапки.
На европските берзи тргувањето е мешано. Германскиот DAX се намали за 0,11 отсто, а италијанскиот FTSE MIB за 0,08 отсто. Францускиот CAC 40 порасна за 0,19 отсто, британскиот FTSE 100 за 0,02 отсто, додека московскиот MOEX забележа раст од 0,28 отсто.
Во текот на неделата се очекува и објавување на записникот од состанокот на Европската централна банка за монетарната политика, како и податоците за трошоците за работна сила и индексот на менаџери за набавки (PMI) во еврозоната.
На берзата во Амстердам, европските фјучерси за природен гас за септември се тргуваа по 64,3 евра за мегават-час.
Еврото се разменува за 1,15922 долари, додека цената на златото достигна 4.348,93 долари за тројанска унца. Пченицата се тргуваше по 6,6788 долари за бушел.
Пад забележаа и главните американски берзански индекси. Dow Jones се намали за 0,22 отсто на 53.343,40 поени, S&P 500 падна за 0,69 отсто на 7.691,76 поени, додека Nasdaq загуби 1,33 отсто и се спушти на 26.289,71 поени.
…
