Најстарата жива личност во светот, Британката Етел Катерхам, го прослави својот 117-ти роденден опкружена со семејството и пријателите во домот за стари лица во Лајтвотер, во англиската област Сари.
Етел е родена на 21 август 1909 година во Шиптон Белинџер, Хемпшир, во времето кога на британскиот престол се наоѓал кралот Едвард Седми. Таа е првата потврдена личност од Велика Британија што доживеала 117 години и последната жива личност со официјално потврдена возраст родена пред 1910 година.
По повод роденденот, Етел им се заблагодари на сите што ѝ испратиле честитки и порача дека и на 117-годишна возраст продолжува да доживува нови работи.
„Дури и на 117 години имав многу први искуства – од галење лама до држење за рака со кралот“, порача таа, додавајќи дека имала прекрасен ден со семејството и пријателите и дека со нетрпение очекува да види што ќе ѝ донесе следната година.
Едно од најзначајните искуства во изминатата година била средбата со кралот Чарлс Трети, кој ја посетил на 18 септември 2025 година, непосредно по нејзиниот 116-ти роденден. За време на средбата, Етел се присетила на неговото прогласување за принц од Велс во 1969 година.
Таа му кажала на Чарлс дека во тоа време „сите девојки биле вљубени во него и сакале да се омажат за него“, што го насмеало британскиот монарх.
Чарлс Трети е шестиот британски владетел за време на животот на Етел. Таа е последната жива личност што била поданик на кралот Едвард Седми, кој починал во мај 1910 година, неполна година по нејзиното раѓање.
Етел официјално стана најстарата жива жена и најстарата жива личност во светот на 30 април 2025 година, по смртта на бразилската калуѓерка Ина Канабаро Лукас, која почина на 116-годишна возраст. Нејзиниот рекорд е признаен од Гинисовата книга на рекорди, по проверка на експертите за долговечност.
Со навршувањето 117 години, Етел стана една од само 13 лица во историјата чија возраст е официјално потврдена и кои успеале да ја достигнат оваа граница. Таа е и најстарата Британка во историјата, надминувајќи го претходниот национален рекорд на Шарлот Хјуз, која почина во 1993 година.
Сепак, светскиот рекорд за најдолг човечки живот и понатаму го држи Французинката Жан Калман, која почина во 1997 година на возраст од 122 години и 164 дена.
Етел Меј Колинс, како што било нејзиното моминско име, била претпоследното од осумте деца во семејството. Долговечноста била присутна и кај нејзината сестра Гледис Бабилас, која живеела 104 години и 78 дена.
На 18-годишна возраст, во 1927 година, Етел самостојно се качила на брод и заминала во Индија, каде што работела како дадилка во британско семејство. Патувањето траело три недели, а во Индија останала три години пред да се врати во Англија.
Во 1931 година, на една вечера го запознала својот иден сопруг Норман Катерхам, офицер во британската армија, кој подоцна напредувал до чин потполковник. Двојката се венчала во катедралата во Солсбери на 18 февруари 1933 година.
Поради воената служба на Норман, семејството живеело и во Хонгконг и Гибралтар. Додека престојувала во Хонгконг, Етел отворила градинка за локални и британски деца, каде што ги учела англиски јазик, игри и рачни изработки.
Етел и Норман имале две ќерки, Џем и Ен. Нејзиниот сопруг починал во 1976 година, а Етел ги надживеала и двете свои ќерки. Денес има три внуки и пет правнуци.
И во длабока старост останала исклучително активна. Возела автомобил до својата 97-ма година, а продолжила да игра бриџ и откако наполнила 100 години. Во домот за стари лица во кој живее, нејзината омилена градина е именувана „Градината на Етел“ во нејзина чест.
Во 2020 година, на 110-годишна возраст, Етел се заразила со ковид-19, но успешно закрепнала, станувајќи една од најстарите познати личности што ја преживеале болеста.
Таа вели дека нема необичен рецепт за долговечност. Нејзината животна филозофија е да ги прифаќа и убавите и тешките моменти, да ги слуша другите, да го прави она што го сака и, пред сè, да избегнува расправии.
Честитка за 117-тиот роденден ѝ испрати и најстариот жив маж во светот, Бразилецот Жоао Марињо Нето, кој во октомври треба да наполни 114 години.
