Техеран повторно испрати предупредување до Софија поради присуството на американска воена опрема и персонал на бугарска територија. Иран порача дека Бугарија не треба да дозволи нејзините бази да бидат користени за евентуални американски или израелски операции против Иран.
Портпаролот на иранското Министерство за надворешни работи, Есмаил Багеи, истакна дека предупредувањето не е насочено кон бугарскиот народ, туку кон секоја држава што би овозможила од нејзина територија да се изведуваат воени дејства против Иран.
„Немаме никаков проблем со бугарскиот народ“, рече Багеи, но додаде дека според ставот на Техеран, обезбедувањето поддршка за американско-израелски воени операции би значело и учество во агресија.
Иранскиот дипломат беше особено директен во однос на можната реакција на Техеран. Тој порача дека Иран го задржува правото да одговори на местото од кое би бил изведен евентуален напад.
Според Багеи, ниту една земја нема причина да се чувствува загрозена од Иран доколку не дозволува нејзината територија или воени бази да бидат користени за напади врз Иран.
Во изјавата тој се осврна и на американските авиони-цистерни кои неодамна престојувале во Бугарија. Станува збор за авиони наменети за воздушно дополнување гориво, а нивното присуство во бугарска база Техеран го оценува како форма на поддршка за американските и израелските воени активности.
Прашањето повторно се отвори откако бугарскиот парламентарен одбор за одбрана го поддржа предлогот на владата за привремено распоредување американски авиони-цистерни и воен персонал во воздухопловната база Безмер.
Иран и претходно реагираше на оваа одлука. Од Техеран тогаш стигна предупредување дека евентуалното учество на Бугарија во планирањето или изведувањето воени операции против Иран би можело да биде оценето како соучесништво во агресија и воени злосторства.
Со најновата изјава, Техеран повторно ја повлекува истата црвена линија – земјите кои ќе дозволат нивната територија да биде користена за напади врз Иран, според иранскиот став, не можат да очекуваат дека ќе бидат целосно исклучени од можниот одговор.
