Тригодишно девојче од Скопје се здобило со тешки телесни повреди во инцидент што се случил во лифт во станбена зграда на подрачјето на Радишани, информира Министерството за внатрешни работи.
Според полицискиот билтен, случајот бил пријавен синоќа околу 20 часот во СВР Скопје од 30-годишната Е.З. од Скопје.
Таа пријавила дека инцидентот се случил на 22 август, околу 18:15 часот.
Според пријавеното, додека жената и нејзините деца се наоѓале во лифтот, вратата ненадејно се отворила, а потоа повторно се затворила.
Во тој момент нејзината тригодишна ќерка била повлечена, при што се здобила со сериозни повреди.
Девојчето било пренесено во ЈЗУ „Св. Наум Охридски“ во Скопје, каде што лекарите констатирале тешки телесни повреди.
Од МВР засега не се соопштуваат дополнителни детали за околностите под кои дошло до дефектот или ненадејното движење на вратата од лифтот.
