На социјалните мрежи се шири вознемирувачка снимка на која се гледа руски војник закопан во земја речиси до врат, а според објавите, станува збор за казна изречена од неговите сопствени командири.
Во една од објавите што се појавија денеска се тврди дека војникот бил ставен во јама и затрупан со земја откако одбил да замине на борбена задача која ја сметал за „бесмислена“ и од која стравувал дека нема да се врати жив.
На снимката мажот се гледа со главата над површината, додека остатокот од телото му е затрупан.
Засега не е независно потврдено кога и каде точно е направена најновата снимка, ниту идентитетот на војникот и неговите командири.
Случајот, сепак, не е единствен.
Уште во мај 2025 година украинскиот портал Censor.NET објави снимка од Курската област во Русија, на која руски војник бил закопан до врат од други припадници на руските сили.
Според тогашните информации, војникот наводно бил казнет поради непочитување наредба или обид да ја напушти позицијата.
На видеото се слушале навреди и закани кон војникот, додека тој останувал затрупан во земјата.
„Јамите“ како средство за казнување
Со текот на времето се појавија и други сведоштва за таканаречените „јами“ – импровизирани места за казнување во кои руски војници наводно биле затворани поради одбивање наредби, напуштање позиции, консумирање алкохол или конфликти со командирите.
Независниот руски медиум „Верстка“, во голема истрага за насилството во руските единици, објави сведоштва според кои војници биле држени во јами без соодветна храна и вода, тепани и принудувани повторно да заминат на фронтот.
Некои од поранешните војници тврделе дека луѓето кои одбивале да учествуваат во нови напади биле третирани како казнети лица и испраќани на исклучително ризични борбени задачи.
Истрагата на „Верстка“ идентификувала повеќе од 100 руски воени лица за кои постојат обвинувања дека биле вмешани во малтретирање или убиства на сопствени војници. Медиумот успеал да провери најмалку 150 смртни случаи поврзани со вакви практики, според податоците што подоцна ги пренесе и британски „Гардијан“.
Меѓу документираните методи се споменуваат тепање, врзување, затворање во подземни јами, закани со егзекуција и испраќање во исклучително опасни напади како форма на казна.
Во еден од случаите, руски војник сведочел дека некои негови соборци поминувале и по еден месец во импровизирана јама во шума, спиејќи на влажна земја, додека други војници тајно им носеле вода, храна и цигари.
Во други снимки што се појавија во изминатиот период се гледаат војници врзани за дрвја или оставени во јами во зимски услови.
Британскиот LBC објави и снимка на која руски војник во јама го моли командирот да престане со казната, додека глас од зад камерата му се заканува дека ќе биде испратен во напад со противтенковски мини.
Истражувањата укажуваат на поширок проблем
Сведоштвата за ваквите казни не доаѓаат само од украински извори.
Руските независни медиуми кои работат надвор од земјата во повеќе наврати објавуваа интервјуа со поранешни или активни руски војници кои зборуваат за насилство од сопствените командири.
Според нивните сведоштва, „јамата“ на делови од фронтот станала неофицијална казна за непослушност, додека во потешки случаи војниците наводно биле испраќани во речиси самоубиствени напади.
„Верстка“ наведува дека практиката првично почесто се поврзувала со единици составени од поранешни затвореници, но со текот на војната слични случаи биле пријавувани и во редовните руски единици.
Руски војници и нивни роднини изнесувале и обвинувања за изнуда на пари – според нив, одредени командири барале плаќање за војник да избегне опасен напад, да добие отсуство или да не биде испратен во „јама“.
Сепак, важно е да се нагласи дека конкретната снимка што моментално кружи на интернет не е независно верификувана во сите детали.
Не е официјално потврдено кој е војникот, од која единица е, ниту кога и каде точно е снимено видеото.
Но, фактот дека во претходните години се документирани повеќе слични случаи ѝ дава поширок контекст на снимката и повторно го отвора прашањето за дисциплината, насилството и третманот на војниците во делови од руските сили за време на војната во Украина.
