Скопскиот аеродром повторно ја потврди својата репутација на водечки европски аеродром, освојувајќи ја престижната ASQ награда за 2025 година за „Најпријатно аеродромско искуство во Европа“. Ова признание, кое Меѓународниот аеродром Скопје го добива по 11-ти пат, е директен рефлекс на високите оценки од патниците, кои ги оценуваа услугите преку анкети за задоволство, вклучувајќи ефикасност при чекирањето, безбедносните контроли, ориентацијата низ аеродромот и целокупното искуство при движење низ него.
„Наградата е јасен показател за нашиот стратешки фокус на ефикасност, безбедност и патничко искуство. Во ТАВ Македонија остануваме посветени на обезбедување беспрекорно патување и постојано усовршување на нашите услуги“, изјави Неџат Курт, генерален директор на компанијата.
Џастин Ербачи, генерален директор на ACI World, истакна дека ASQ признанието ја потврдува континуираната заложба на скопскиот аеродром да ги слуша и да ги исполнува очекувањата на своите патници, обезбедувајќи извонредно патничко искуство.
Аеродромот во Скопје се натпреварува во панел од 20 европски аеродроми со годишен промет од 2 до 5 милиони патници, заедно со аеродроми од Италија, Шпанија, Португалија, Норвешка, Естонија, како и со два други аеродроми управувани од ТАВ – Загреб и Тбилиси. Претходно, Меѓународниот аеродром Скопје ја освојуваше ASQ наградата во различни категории според бројот на патници, од 2012 до 2024 година, демонстрирајќи континуирано растечки квалитет на услугите и способност да се натпреварува со најдобрите европски аеродроми.
