Хеликоптер на македонската Армија денеска беше вклучен во борбата со шумскиот пожар што избувна во месноста Макази, на падините на Националниот парк „Пелистер“, во реонот на Општина Ресен.
Хеликоптерот Ми-8МТ на Воздухопловниот ВИНГ извршил тричасовен налет над зафатеното подрачје, при што врз активните жаришта биле исфрлени 14 противпожарни ведра со вкупно 28 тони вода.
Интервенцијата од воздух се одвивала во координација со противпожарните и другите екипи распоредени на терен, кои истовремено се обидувале да го спречат ширењето на огнената стихија.
Ангажирањето на хеликоптерот било особено важно за пристап до деловите од планината што се тешко достапни за противпожарните возила и екипите од земја.
Од “Армијата” (https://www.instagram.com/reel/Dcqajq7zcct/) информираат дека Воздухопловниот ВИНГ останува во целосна оперативна подготвеност и дека, доколку состојбата го наложи тоа, ќе продолжи да обезбедува воздушна поддршка во гаснењето.
Екипите и натаму ја следат состојбата на терен поради можноста од повторно активирање или ширење на пожарот кон други делови од Националниот парк.
Надлежните повторно апелираат до граѓаните на исклучително внимателно однесување во шумските и планинските подрачја, особено во услови на високи температури, суша и ветер, кога огнот може брзо да се прошири.
