Украинскиот претседател Володимир Зеленски по повеќечасовните разговори со американските претставници Стив Виткоф и Џаред Кушнер порача дека Киев нема да прифати мировен договор без „силни и јасни“ безбедносни гаранции.
Средбата во Киев, која според Би-Би-Си имаше силна симболика, се одржа откако американските претставници пристигнаа директно од Москва, каде претходно разговарале со рускиот претседател Владимир Путин. Виткоф и Кушнер во украинската престолнина допатувале со воз, поради ризикот од руски воздушни напади.
Зеленски ги пречекал пред катедралата „Света Софија“, во близина на објект на украинските безбедносни служби кој неодамна беше погоден со руски дронови.
По неколкучасовната средба, на разговорите им се придружиле и советници за национална безбедност од неколку европски земји, меѓу кои и британскиот советник Џонатан Пауел.
Учесниците по состанокот зборувале позитивно, оценувајќи ги разговорите како содржајни и конструктивни. Била изразена и надеж дека повторно би можеле да се воспостават пошироки преговори во кои, покрај Украина и САД, би учествувале и европските партнери.
Сепак, суштинските разлики меѓу Москва и Киев остануваат длабоки.
Американските претставници во Киев пристигнале по разговорите со Путин, кој им рекол дека Русија бележи „опиплив напредок“ на бојното поле. Украинската страна, пак, тврди дека во август освоила повеќе територија отколку што изгубила и дека руските сили во истиот период претрпеле околу 42.000 загинати и ранети.
Путин повторно инсистирал на решавање на, како што ги нарекува, „коренските причини“ за конфликтот. Во тие барања Москва вклучува територијални отстапки од Украина, откажување од членството во НАТО и намалување на украинските вооружени сили.
Зеленски, од друга страна, јасно ставил до знаење дека за Киев се неопходни сериозни безбедносни гаранции, како и силна украинска армија. Тој не покажал подготвеност да се откаже од териториите во источен Донбас, прашање за кое рекол дека е „тешко“.
Американскиот пратеник Виткоф по средбата изјавил дека има одреден напредок и дека постојат елементи врз кои би можел да се гради мировен договор. Сепак, тој признал дека двете страни ќе мора да направат компромиси.
Во Киев, според Би-Би-Си, расте очекувањето дека војната би можела да продолжи и во текот на зимата, додека дел од дипломатите сметаат дека посериозна можност за мировен договор би можела да се отвори напролет следната година.
Зеленски им се заблагодарил на американските претставници за посетата, особено затоа што договорената привремена пауза во воздушните напади им овозможила на жителите на Киев краток предах.
Сепак, засега нема очекувања дека примирјето ќе трае долго.
…
