Од претпријатието информираат дека значителен дел од дефектите на водоводната мрежа не се поврзани со работата и одржувањето на ЈКП „Шар“, туку се последица на несовесно или несоодветно изведување градежни и инфраструктурни работи од страна на приватни компании, изведувачи и физички лица.
Според нив, при градежни зафати често не се врши соодветна проверка на постојната подземна инфраструктура, поради што доаѓа до оштетување на водоводната мрежа. Како последица, граѓаните се соочуваат со дефекти, прекини и намален притисок во системот.
Од ЈКП „Шар“ велат дека, иако не можат да влијаат врз начинот на кој трети лица ги изведуваат градежните активности, нивните екипи секојдневно се на терен и интервенираат за санирање на настанатите дефекти.
„Нашите екипи се на терен секојдневно и интервенираат во услови кога дефектите се појавуваат еден по друг. Приоритет е што побрзо отстранување на дефектот и повторно воспоставување на стабилно водоснабдување, без разлика кој е причинителот“, велат од претпријатието.
ЈКП „Шар“ упати апел до сите компании, изведувачи и физички лица кои реализираат градежни работи да постапуваат одговорно и внимателно, да ја почитуваат постојната инфраструктура и навремено да се координираат со надлежните служби.
Од претпријатието им се заблагодарија на граѓаните за трпението и разбирањето, посочувајќи дека екипите остануваат максимално ангажирани до целосно нормализирање на состојбата со водоснабдувањето во Тетово.
…
