Министерството за јавна администрација започна петдневна TAIEX експертска мисија за воспоставување единствен и усогласен систем на плати во јавниот сектор.
Мисијата ја отворија министерот за јавна администрација, Горан Минчев, и вршителката на должноста амбасадор на Република Грција, Христина Василату. Во рамки на мисијата, експерти од грчкото Министерство за национална економија и финансии ќе го презентираат искуството од грчкиот Единствен систем на исплата, кој овозможува централизирано и усогласено управување со исплатите во јавниот сектор.
Минчев посочи дека во моментов постојат различни правила, процедури и практики меѓу институциите, што создава нееднаквости и го отежнува воспоставувањето единствени стандарди за вреднување на работата.
„Нашата цел е јасна, да воспоставиме систем во кој правилата ќе бидат јасни и еднакви за сите, а принципот ‘еднаква плата за еднаква работа’ да биде реално применлив во целиот јавен сектор“, порача Минчев.
Министерството работи на нова законска рамка за системот на плати, со план законското решение да биде заокружено до крајот на 2026 година. Неговото постепено и систематско спроведување, пак, е предвидено да започне во 2027 година.
Министерот нагласи дека целта не е механички да се преземе грчкиот модел, туку да се анализира неговото функционирање и да се изгради решение приспособено на институционалните, законските и финансиските услови во Македонија.
Според Министерството, воспоставувањето на поусогласен, транспарентен и праведен систем на плати треба да придонесе за подобра контрола на јавните средства, поефикасно управување со исплатите и поквалитетни податоци за креирање јавни политики.
…
