Македонскиот стартап „Прилог“ развива систем базиран на вештачка интелигенција кој има цел автоматски да ги открива и решава софтверските грешки, а амбицијата на тимот е нивниот производ да стане алатка што ќе ја користат инженерски тимови ширум светот.
Зад стартапот стои софтверскиот инженер Роберт Марковски, кој има повеќе од една деценија искуство во индустријата. Тој претходно ја основал компанијата „Мозок“ во Келн, Германија, која работела со клиенти како Mercedes и MediaMarkt.
Идејата за „Прилог“ произлегла од проблем со кој, според Марковски, се соочуваат речиси сите софтверски компании – голем број багови за чие решавање инженерите често немаат доволно време. Затоа тимот развива систем кој со помош на вештачка интелигенција треба во реално време автоматски да ги решава ваквите проблеми.
Првиот прототип бил изработен во ноември 2025 година, а производот веќе се користи и има околу 20 потенцијални клиенти, меѓу кои стартапи и големи компании. Постојаниот тим го сочинуваат тројца луѓе, со дополнителни инженери кои се вклучуваат по потреба, додека значителен дел од работата ја извршуваат софтверски агенти.
„Нашата амбиција е да сме следниот GitHub, да сме продукт со кој секој инженерски тим на светот ќе нема багови“, вели Марковски.
Компанијата сега е блиску до затворање на својата прва инвестициска рунда и разговара со повеќе инвеститори. Целта е да обезбеди околу или повеќе од еден милион, при проценка на компанијата од десет милиони. Најголем дел од разговорите се со американски инвеститори, но интерес има и од Германија, Хрватска, Бугарија и други европски пазари.
Досега „Прилог“ е целосно самофинансиран, а евентуалната инвестиција тимот планира да ја насочи кон експанзија, маркетинг и продажба. Иако зад проектот стои целосно македонски тим, компанијата работи на далечина и има глобални амбиции.
Извор: https://it.mk/makedonski-startap-ima-ambitsija-da-bide-sledniot-github-za-inzhenerskite-timovi/
…
