Американскиот претседател Доналд Трамп го потпиша законот со кој се воведуваат и прошируваат санкциите против Русија, како и дополнителни мерки поврзани со руските енергенси. Законот, наречен „Lindsey O. Graham Sanctioning Russia and Iran Act of 2026“, беше потпишан на 18 септември, соопшти Белата куќа.
Новиот закон предвидува санкции и ограничувања насочени кон рускиот енергетски и одбранбен сектор, како и кон танкерската флота која се користи за заобиколување на постојните санкции. Со него се прошируваат и овластувањата на американскиот претседател за воведување царини кон земји кои купуваат руски енергенси или ѝ помагаат на Москва да ги заобиколи санкциите.
Мерките можат да имаат последици и за односите на САД со големи купувачи на руска нафта и гас, меѓу кои се Кина и Индија, доколку Вашингтон одлучи да ги примени предвидените царини.
Законот го носи името на покојниот американски сенатор Линдзи Греам, кој беше еден од главните застапници за заострување на санкциите кон Русија. Покрај мерките против Москва, законскиот пакет го продолжува и санкционирањето на Иран.
Украинскиот претседател Володимир Зеленски му се заблагодари на Трамп за потпишувањето на законот. Тој порача дека неговата целосна и брза примена би била начин да се оддаде почит на Греам, додавајќи дека притисокот врз Русија го поврзува со напорите за прекин на војната.
Од Кремљ претходно предупредија дека дополнителните американски санкции би можеле да ги отежнат дипломатските напори за постигнување мировен договор во Украина. Портпаролот на Кремљ, Дмитриј Песков, ги опиша новите мерки како непријателски потег и оцени дека тие би можеле дополнително да ги искомплицираат мировните преговори.
…
