Единствената македонска партија во Албанија, Македонска алијанса за европска интеграција (МАЕИ), поднесе тужба до Управниот суд на Албанија против Владата во Тирана. Повод за тужбата е одлуката за отворање три центри за мигранти на територијата на Општина Пустец, каде што живее македонско национално малцинство.
Од МАЕИ истакнуваат дека одлуката е донесена без консултација со локалната самоуправа, без јавна расправа и без почитување на правата на локалното население. Партијата бара изземање на Општина Пустец од државниот план за отворање мигрантски центри.
„Оваа одлука претставува директно загрозување на интересите, безбедноста и демографската стабилност на Македонската заедница во Општина Пустец. Таа е во спротивност со Уставот, законите и меѓународните обврски што Албанија ги има преземено за заштита на националните малцинства“, соопшти МАЕИ.
Партијата најави дека ќе продолжи со правна и институционална борба сè додека не се заштитат правата, положбата и достоинството на Македонската заедница во Албанија.
