Американскиот претседател Доналд Трамп и украинскиот претседател Володимир Зеленски оваа недела ќе се сретнат во Њујорк, на маргините на Генералното собрание на Обединетите нации. Средбата била договорена во текот на нивниот телефонски разговор во неделата.
Според Axios, разговорот се одржал во момент кога Вашингтон се обидува да посредува меѓу Русија и Украина и да поттикне нови чекори кон деескалација и продолжување на преговорите. Во исто време, борбите меѓу двете страни продолжуваат.
Според извор запознаен со разговорот, Трамп повеќепати побарал од Зеленски Украина да престане со нападите врз руските рафинерии за нафта. Како причина, тој ги посочил последиците врз глобалниот пазар на горива.
„Дизел“ наводно бил еден од зборовите што најчесто се повторувале во текот на разговорот. Изворот за Axios рекол дека Трамп предупредил оти нападите врз руските рафинерии придонесуваат за зголемување на цените на дизелот на глобалниот пазар.
Зеленски по разговорот оцени дека средбата со Трамп во Њујорк може да биде значајна за натамошниот тек на дипломатските напори.
„Многу работи поминавме. Се договоривме за средба во Њујорк, а таа средба би можела многу работи да промени. Постои дипломатски замав“, напиша Зеленски.
Средбата доаѓа откако Трамп потпиша закон за воведување санкции кон Русија и одобри нов пакет воена помош за Украина.
Во меѓувреме, украинскиот главен преговарач Рустем Умеров ги отфрли наводите за незадоволство во Киев од работата на американските претставници Стив Виткоф и Џаред Кушнер. Тој посочи дека украинската страна продолжува тесно да соработува со нив во обид да се најде решение за прекин на војната и да се обезбедат безбедносни гаранции за Украина.
…
