Нови правила воведе ООУ „Димитар Влахов“ во Штип, каде што околу 930 ученици од оваа учебна година имаат ограничувања за користење мобилни телефони, но и за внесување одредени видови храна и пијалаци.
Мерките биле договорени со родителите уште пред завршувањето на минатата учебна година. Целта е учениците да бидат повеќе насочени кон наставата, дружењето и создавањето поздрави навики.
Телефоните смеат да ги носат само учениците на кои навистина им се потребни, на пример поради организација на превозот и враќањето дома. Во тие случаи уредот треба да биде без интернет, исклучен и предаден кај класниот раководител веднаш по пристигнувањето во училиштето.
Новите правила се однесуваат и на исхраната. Во училиштето не е дозволено учениците да носат чипс, смоки и обоени сокови. Наместо тоа, трипати неделно им се обезбедува свежо овошје.
Училиштето, во соработка со локални пекари, подготвило и мени со јогурт, печива и други оброци, додека од пијалаците се дозволени вода, млеко и домашни сокови.
Директорот Дејан Здравков вели дека со ограничувањето на телефоните се очекува да се намали зависноста од електронските уреди и да се поттикне поголема директна комуникација меѓу учениците.
Одлуката е поддржана од Наставничкиот совет, Училишниот одбор и Советот на родители. Од раководството на училиштето велат дека веќе по првата недела се забележуваат позитивни промени во однесувањето на учениците.
…
