Европската комисија предложи значително ублажување на правилата за автомобилите по 2035 година, но документите поврзани со одлуката откриваат дека нејзиното сопствено регулаторно тело претходно изразило резерви за дел од анализата врз која се темели промената.
Според новиот предлог, наместо досегашната цел од 100 отсто намалување на емисиите од издувните гасови кај новите автомобили од 2035 година, производителите би требало да постигнат 90 отсто намалување. Преостанатите 10 отсто би се компензирале преку механизми поврзани со нискојаглероден челик произведен во ЕУ, е-горива и биогорива.
Тоа би оставило простор и по 2035 година на европскиот пазар да продолжат да се продаваат plug-in хибриди, возила со продолжувач на автономијата, благи хибриди и одредени автомобили со мотори со внатрешно согорување, покрај целосно електричните возила.
Но, пред објавувањето на предлогот, Регулаторниот одбор за надзор при Европската комисија дал оценка „позитивно со резерви“.
Во своето мислење, одборот оценил дека анализата на трошоците и придобивките не е целосна и дека не е доволно објаснета пропорционалноста на предложените мерки.
Одборот побарал и подобро образложение зошто е потребно менување на правилата што биле донесени само неколку години претходно, како и поконкретни податоци за проблемите со кои се соочуваат производителите.
Од Комисијата, пак, промената ја оправдуваат со големите промени низ кои минува европската автомобилска индустрија, зголемената меѓународна конкуренција и потребата производителите да добијат поголема флексибилност.
Што значи тоа за 2035 година?
Според правилата што моментално важат, од 2035 година целта за просечните емисии на новите автомобили и комбиња е поставена на 100 отсто намалување во однос на референтната вредност.
Во пракса, тоа значи дека новите автомобили со класични бензински и дизел-мотори не би можеле да го исполнат поставениот услов.
Со предложените измени, границата би била ублажена. Производителите би можеле да ги намалат емисиите од издувните гасови за 90 отсто, а преостанатиот дел да го компензираат преку други механизми.
Важно е што ова сè уште не е конечно правило. Станува збор за законодавен предлог кој треба да помине низ процедурата во Европскиот парламент и Советот на ЕУ.
Ако биде усвоен во предложената форма, 2035 година повеќе нема да претставува толку строга граница за автомобилите со мотори со внатрешно согорување.
Електричните автомобили и понатаму би имале централна улога во транзицијата, но бензинците, хибридите и други технологии би добиле поголем простор за останување на европскиот пазар.
…
