Премиерот Христијан Мицкоски најави нови кадровски промени во вториот и третиот ешалон на власта, кои би требало да се реализираат во наредните една до две недели.
Промените ќе опфатат дел од позициите на заменици-министри и директори, а конечните одлуки треба да бидат усогласени со коалициските партнери.
На прашањето кога може да се очекуваат новите кадровски решенија, Мицкоски рече дека веќе има јасна претстава за тоа кои позиции би биле опфатени.
„Јас отприлика имам што, каде и како. Треба коалициски да потврдиме и ќе се случи во следнава недела-две“, изјави Мицкоски.
Најавените промени доаѓаат по реконструкцијата на Владата во јули, кога беа направени промени на повеќе министерски позиции.
Уште при најавата на реконструкцијата, премиерот посочи дека наесен ќе се отвори и прашањето за составот на заменик-министрите и останатите функционери во вториот и третиот ешалон.
Засега не се соопштува кои заменици-министри и директори би можеле да бидат сменети, ниту пак кои кандидати се разгледуваат за нивни наследници.
Новите кадровски решенија, според најавата на премиерот, ќе треба да бидат претходно усогласени со коалициските партнери.
…
