Новиот руски буџетски план покажува дека Москва засега не планира да ги намалува воените трошоци. Напротив, Кремљ подготвува зголемување на даноците, поголемо задолжување и користење на државните резерви за да продолжи со финансирањето на воените приоритети.
Според документите анализирани од „Ројтерс“, Русија во следните три години би требало да потроши околу 50 билиони рубљи само за одбраната.
За 2027 година се планирани 17,1 билион рубљи за одбранбени цели, што би бил највисок износ од почетокот на руската инвазија врз Украина.
Воените трошоци растат, приходите од енергенси паѓаат
Зголемувањето на воените издатоци доаѓа во период кога руските јавни финансии се соочуваат со сè поголем притисок.
Владата ја удвои проценката за буџетскиот дефицит за 2026 година – од првично предвидените 1,6 на 3,2 отсто од БДП.
Во исто време, намалена е и очекуваната заработка од нафтата и гасот, кои се меѓу клучните извори на приходи за руската држава. Проекцијата за приходите од продажба на енергенси е намалена од 8,9 на 7,6 билиони рубљи.
Вкупната државна потрошувачка годинава би требало да се зголеми за 13,2 отсто и да достигне 48,6 билиони рубљи.
Поголемо задолжување и користење на државните резерви
За да го покрие растечкиот буџетски дефицит, Москва планира комбинација од нови даноци, задолжување и повлекување средства од државните резерви.
Нето задолжувањето за 2026 година треба да се зголеми за 26 отсто, на пет билиони рубљи. Дополнително, од Фондот на националното богатство се планира повлекување на 459 милијарди рубљи, што претставува околу 11 отсто од неговиот ликвиден дел.
За 2027 година е предвидено уште поголемо задолжување – зголемување од 43 отсто, на 7,7 билиони рубљи.
Според планот, рускиот државен долг тогаш би достигнал 21,7 отсто од БДП, надминувајќи го прагот од 20 отсто кој руските власти досега го сметаа за безбедна граница.
Нов данок за големите компании
Дел од дополнителните средства Кремљ планира да ги обезбеди и преку ново даночно оптоварување на компаниите.
Меѓу планираните мерки е воведување нов данок на екстрапрофитот на металуршките и рударските компании, од кој руската влада очекува околу 200 милијарди рубљи годишно.
Предлог-буџетот руската влада треба да му го достави на парламентот до 1 октомври.
…
