Извозот на сурова нафта од Блискиот Исток значително се зголеми во септември, достигнувајќи 12,8 милиони барели дневно, што е највисоко ниво од почетокот на конфликтот меѓу Израел и САД од една страна и Иран од друга, во февруари, покажуваат податоците на Kpler.
Растот главно се должи на зголемените испораки преку Ормускиот Проток, каде што овој месец се очекува да поминуваат околу 7,4 милиони барели нафта дневно.
Прелиминарните податоци покажуваат дека Саудиска Арабија пренасочила дел од својот извоз подалеку од пристаништето Јанбу на Црвеното Море, откако клучен нафтовод бил оштетен во напади.
И покрај значителното закрепнување, извозот на нафта од регионот и натаму е околу 6 милиони барели дневно под нивото од февруари. Тогаш извозот изнесувал 18,8 милиони барели дневно.
Саудиска Арабија го зголемува извозот
Саудиска Арабија, најголемиот извозник на нафта во регионот, во септември се очекува да испорача околу 5,4 милиони барели дневно.
За споредба, во август нејзиниот извоз изнесувал околу 2,446 милиони барели дневно, што значи дека испораките се повеќе од двојно зголемени за само еден месец.
Особено значителен раст е забележан кај испораките од пристаништето Рас Танура во Персискиот Залив. Во септември тие достигнале околу 3,6 милиони барели дневно, наспроти 929.000 барели дневно во август.
Сепак, и ова ниво останува под она од февруари, кога од Рас Танура се испорачувале околу 6,411 милиони барели дневно.
Податоците на Kpler покажуваат дека минатата недела низ Ормускиот Проток поминале 19 големи танкери за сурова нафта. Секој од нив може да превезува приближно два милиони барели саудиска нафта.
Бројките, сепак, не ги опфаќаат евентуалните танкери кои минале низ теснецот со исклучени транспондери, со цел да не бидат следени, пренесува Reuters.
…
