Граѓаните да не купуваат огревно дрво од нелегални продавачи, дури и кога им се нуди по пониска цена. Со таквата купопродажба директно се поддржуваат дрвокрадството и уништувањето на шумите, предупредува заменик-директорот на ЈП „Национални шуми“, Кире Михаилов.
Според него, зад бесправната сеча често стојат организирани групи, а дел од нив се подготвени и физички да нападнат вработени во претпријатието и припадници на Шумската полиција. Како пример ги посочи инцидентите во Штипскиот Регион во текот на летото.
Михаилов предупреди дека напад врз овластено службено лице повлекува сериозни кривични последици.
Проблемот, како што призна, постои и во самото претпријатие. Утврдени биле случаи на вработени за кои има сознанија дека биле поврзани со криминални структури. Таму каде што има докази, рече Михаилов, се поведуваат постапки, а веќе има суспензии, кривични пријави и дисциплински постапки.
Од „Национални шуми“ посочуваат дека, покрај бесправната сеча, шумите секоја година се загрозени и од пожари, меѓу кои има и намерно предизвикани. Затоа апелот до граѓаните е да не ја поттикнуваат нелегалната продажба на дрва со нивно купување.
