Распоредот на најбогатите луѓе во светот значително се промени во текот на изминатиот месец. Според октомвриската листа на „Форбс“, дури седум од десетте најбогати милијардери ја смениле позицијата.
На врвот и понатаму е Илон Маск, чие богатство се проценува на 936 милијарди долари. Во последниот месец неговото богатство се зголемило за околу 44 милијарди долари, главно благодарение на растот на вредноста на „SpaceX“.
Најголемиот скок го направи Џеф Безос. Основачот на „Амазон“ се искачи на второто место, откако неговото богатство порасна за неверојатни 102 милијарди долари и достигна околу 370 милијарди долари.
Растот на богатството на Безос се поврзува со новите проценки на вредноста на неговата вселенска компанија „Blue Origin“, како и на стартапот за индустриска вештачка интелигенција „Prometheus“.
Со прескокнувањето на Безос, Лери Пејџ од „Гугл“ падна на третото место со околу 286 милијарди долари. Неговото богатство сепак се зголемило за околу осум милијарди долари.
Четврти е Мајкл Дел со богатство од околу 268 милијарди долари. Тој во изминатиот месец додал околу 28 милијарди долари, откако акциите на „Dell Technologies“ пораснаа за 18 отсто поради зголемената побарувачка за сервери поврзани со вештачката интелигенција.
Основачот на „Гугл“, Сергеј Брин, е петти со околу 263 милијарди долари, иако и неговото богатство пораснало за околу седум милијарди долари.
Марк Закерберг останува на шестото место. Богатството на основачот на „Мета“ се зголемило за околу 55 милијарди долари и достигнало 251 милијарда долари.
На седмото место е Џенсен Хуанг, а по него следуваат Лери Елисон и Стив Балмер.
На десеттото место повторно се најде Ворен Бафет, кој се врати во друштвото на десетте најбогати луѓе во светот. Од листата, пак, испадна шпанскиот моден магнат Амансио Ортега, чие богатство се намалило за околу шест милијарди долари и изнесува 141,8 милијарди долари.
Лери Елисон исто така забележал пад, со намалување на богатството за околу 13 милијарди долари, на 179 милијарди долари, по падот на акциите на „Oracle“.
Вкупното богатство на десетте најбогати луѓе во светот во октомври се проценува на околу 3,1 трилиони долари. Тоа е зголемување од околу 300 милијарди долари во однос на претходниот месец.
Топ 10 најбогати луѓе во светот – октомври 2026
- Илон Маск
- Џеф Безос
- Лери Пејџ
- Мајкл Дел
- Сергеј Брин
- Марк Закерберг
- Џенсен Хуанг
- Лери Елисон
- Стив Балмер
- Ворен Бафет
Сите десетмина се американски државјани, а шестмина од нив имаат проценето богатство од најмалку 200 милијарди долари.
…
