Основниот суд во Куманово му изрече доживотна казна затвор на 25-годишниот Бојковски од Старо Нагоричане, откако го прогласи за виновен за четири убиства и два обида за убиство на жени. Со пресудата е завршена првостепената постапка.
Бојковски е осуден за убиствата на Станче Каровска, Јанка Антевска, Марија Маринковска и Мира Станковска. Според утврденото во постапката, делата биле извршени од јануари 2025 до февруари 2026 година, а жртвите биле претежно повозрасни и немоќни жени што живееле сами.
Првото убиство било извршено ноќта меѓу 5 и 6 јануари 2025 година во Клечовце, а второто во периодот од 5 до 7 јуни истата година во Драгоманце. Другите две убиства се случиле во Старо Нагоричане во јануари 2026 година и во Челопек во февруари истата година.
Постапката опфатила и два обида за убиство во Челопек. При првиот, на 22 јули 2025 година, нападнатата жена успеала да повика помош и да го спречи напаѓачот, по што тој побегнал.
Вториот обид, според обвинителството, се случил на 9 февруари 2026 година, кога Бојковски се откажал од намерата и го напуштил местото.
…
