ВМРО-ДПМНЕ има највисока поддршка меѓу партиите, а Христијан Мицкоски најголема доверба меѓу политичките лидери, покажува анкетата на МКД.мк, спроведена од агенцијата „Маркет вижн“. Истовремено, значителен дел од испитаниците не се определиле за гласање или немаат доверба во ниту еден партиски лидер.
На прашањето за која партија би гласале на следните избори, 19,3 отсто ја избрале ВМРО-ДПМНЕ, а 5,6 отсто СДСМ. ДУИ и ВЛЕН имаат еднаква поддршка од по 4,2 отсто. Во објавените резултати за Левица се наведуваат 4 отсто, а за ЗНАМ 1 отсто.
Вкупно 41 отсто од анкетираните одговориле дека нема да гласаат, не знаат дали ќе излезат на избори или не сакале да одговорат.
Во делот за довербата во политичките лидери, Мицкоски има поддршка од 20,4 отсто, а претседателот на СДСМ, Венко Филипче, од 3,8 отсто. Во Али Ахмети доверба изразиле 3,7 отсто, во Димитар Апасиев 3,4 отсто, а во Изет Меџити 2,6 отсто од испитаниците.
Најголем дел од анкетираните, односно 44,1 отсто, изјавиле дека немаат доверба во ниту еден лидер на политичките партии. Дополнителни 12,5 отсто не сакале да одговорат на ова прашање.
Истражувањето било спроведено од 11 до 27 септември, со телефонско анкетирање по методот CATI, на примерок од 1.200 испитаници. Наведената маргина на статистичка грешка е 3 отсто, со интервал на доверба од 95 отсто.
Според објавената методологија, примерокот е репрезентативен на ниво на Македонија според регионот, полот, возраста и етничката припадност, во согласност со податоците за резидентното население од пописот во 2021 година.
…
