Руските разузнавачки служби ги засилуваат тајните операции во Европа, а меѓу потенцијалните цели се директори и високи раководители на одбранбени компании што ја снабдуваат Украина со оружје и воена опрема, објави „Фајненшл тајмс“, повикувајќи се на претставници на разузнавачките служби од пет европски земји.
Според нивните проценки, плановите сè почесто вклучуваат атентати врз цивили поврзани со воената помош за Киев. Предупредувањата веќе поттикнале дел од компаниите да ја засилат личната заштита на своите раководители.
Целта на Москва, според проценките пренесени во извештајот, е да ги попречи производството и испораките на оружје за Украина и да ја ослабне европската поддршка за Киев. Засилувањето на овие активности се поврзува со забавеното руско напредување на бојното поле и со притисоците врз руската економија.
Разузнавачките извори ја посочуваат руската воена разузнавачка служба ГРУ како клучен носител на ваквите операции. Потенцијалните мети не се ограничени на големите производители на оружје: предупредувањата ги опфаќаат и помалите компании, особено производителите на дронови и компоненти што директно влијаат врз украинските воени способности.
Во Германија, безбедносните служби ги засилиле контактите со директорите и вработените во одбранбената индустрија. На дел од раководителите им било препорачано да воведат дополнителни мерки за лична безбедност, вклучително и ангажирање приватно обезбедување.
За сериозноста на заканата јавно зборуваше и претседателот на германската служба за заштита на уставниот поредок, Синан Селен. На сослушување во Бундестагот на 5 октомври тој предупреди дека, покрај шпионажата, се забележува подготвеност за саботажи и операции за убивање. Меѓу особено изложените сектори ги посочи транспортот, одбранбената индустрија и воената инфраструктура.
Еден од најпознатите претходни случаи е планот за убиство на Армин Папергер, извршниот директор на германскиот производител на оружје „Рајнметал“. Според претходните медиумски извештаи, американските и германските разузнавачки служби го откриле рускиот план во 2024 година. Компанијата е значаен снабдувач на Украина со оружје и воена опрема.
Новите предупредувања укажуваат дека ризикот сега се разгледува пошироко, вклучително и за раководители на помали фирми чии производи се важни за снабдувањето на украинската армија.
Паралелно со заканите по луѓето, европските служби предупредуваат на саботажи и активности насочени кон фабриките, магацините и транспортните правци.
Данската разузнавачка и безбедносна служба ПЕТ соопштува дека забележала конкретно руско планирање и подготовка на саботажи, првенствено против компании од одбранбената индустрија и субјекти поврзани со воената поддршка за Украина. Според нејзината проценка, саботажната кампања во Европа се интензивирала од летото 2026 година.
За подготовка на операциите, според ПЕТ, се регрутираат лица преку социјални мрежи и апликации како Телеграм. Тие добиваат пари за навидум едноставни задачи, како фотографирање или снимање компании, магацини, возила и пристапи до објекти.
Собраните информации можат да послужат за извидување и подготовка на саботажа. Во многу случаи, лицата што ги извршуваат задачите не знаат кој е вистинскиот нарачател или за што ќе бидат употребени снимките. Користењето посредници дополнително ја отежнува истрагата и утврдувањето на врската со руските служби.
Според европските проценки, ваквите операции имаат и психолошка цел: да ги заплашат раководителите и вработените, да ги зголемат трошоците за обезбедување и да создадат несигурност околу соработката со Украина. ПЕТ предупредува дека пошироката намера е да се ослабне политичката, економската и воената поддршка за Киев меѓу европските граѓани и политичари.
Москва редовно ги отфрла западните обвинувања за вмешаност во саботажи, обиди за атентати и други тајни операции во Европа.
…
