Американскиот претседател Доналд Трамп го критикуваше НАТО, тврдејќи дека сојузниците направиле „глупава грешка“ откако одбиле да помогнат на САД во обезбедувањето на Ормускиот Теснец за време на конфликтот со Иран, јави Би-би-си.
Трамп рече дека, и покрај нарушувањата на критичниот воден пат и притисокот врз цените на нафтата, САД не се зависни од помош од сојузниците. „Не ни е потребна никаква помош од НАТО, но тие требаше да бидат таму“, истакна тој, коментирајќи ја неподготвеноста на некои членки на алијансата да испратат бродови за придружба и чистење мини во Заливот.
Претседателот потенцираше дека конфликтот претставува „голем тест“ за односите на САД со НАТО, и се пожали дека сојузниците имаат корист од американската поддршка, особено во случајот со Украина, без да сторат ништо за САД во критични моменти.
Трамп не откри кои земји се подготвени да помогнат, но наведе дека само неколку бродови што превезуваат иранска нафта до Индија и Кина успеале да поминат низ теснецот откако започна конфликтот. Неколку комерцијални товарни бродови биле погодени, што влијаело на глобалниот пазар на нафта.
Претседателот додаде дека моментално не размислува за какви било одмазднички мерки, но повтори дека однесувањето на сојузниците кон САД во време на потреба било „неправедно“.
