Администрацијата на Доналд Трамп ја предупредила Украина дека САД би можеле да ја прекинат размената на разузнавачки информации и европската набавка на американско оружје за Киев доколку продолжат далекусежните напади врз руските енергетски постројки, објави Си-ен-ен, повикувајќи се на двајца европски функционери.
Според нивните изјави, Стејт департментот и Пентагон во текот на викендот испратиле предупредувања до украинските и европските претставници. Американската војска директно контактирала и со воени команданти во Украина.
За можноста за прекин на соработката и набавката на оружје прв објави „Фајненшл тајмс“. Еден од европските функционери што примил повик од американското Министерство за одбрана изјавил дека Вашингтон интензивно ја пренесува пораката до сојузниците.
„Му се јавуваат на Киев… Им се јавуваат на сите во Европа“, рекол тој.
Предупредувањата доаѓаат во услови на зголемени тензии меѓу Трамп и украинскиот претседател Володимир Зеленски поради нападите врз руските рафинерии. Американскиот претседател ги поврзува нападите врз енергетската инфраструктура со растот на цените на дизелот и бара двете страни да ги прекинат.
Трамп во неделата објавил дека Русија и Украина се договориле за, како што го нарекол, „енергетско примирје“. Сепак, извор близок до Зеленски изјавил дека објавата била изненадување за украинската страна.
Зеленски потоа на платформата Икс порача дека Украина поддржува примирје, но дека е неопходна и поддршка од Русија, додавајќи дека Киев очекува детали од Вашингтон.
Евентуалниот прекин на американската поддршка би можел сериозно да ја погоди украинската одбрана. Според европските функционери што зборувале за Си-ен-ен, разузнавачките информации се особено важни за откривање на подготовките за руски ракетни напади и за навремена реакција на украинските сили.
Прекинот на набавката на оружје преку механизмот ПУРЛ, преку кој европските сојузници купуваат американско вооружување за Украина, најтешко би се одразил врз испораките на ракети-пресретнувачи за системите „Патриот“. Според извештајот, Украина веќе се соочува со сериозен недостиг од овие ракети, додека Русија ги засилува нападите со ракети и беспилотни летала.
Сепак, друг европски функционер изјавил дека НАТО во текот на викендот сè уште не забележал промени во програмата ПУРЛ. Засега станува збор за предупредувања, а не за потврден прекин на испораките.
Вашингтон веќе ја прекина размената на разузнавачки информации со Украина во март 2025 година, по напнатата средба на Трамп и Зеленски во Белата куќа. Соработката подоцна беше обновена, откако Киев го прифати американскиот предлог за примирје на разговорите во Саудиска Арабија.
Новите предупредувања дополнително ги оптоваруваат односите меѓу двајцата претседатели. Според Си-ен-ен, тие изминатите денови се судриле и околу американскиот договор со Владимир Путин за снабдување на пазарот со руски дизел. Трамп во саботата сугерирал и дека Украина треба да добие нов лидер.
…
