Четириесет и четиригодишен гостиварец е лишен од слобода откако полицијата регистрирала дека управувал „ролс-ројс“ со брзина од 194 километри на час на делница со ограничување од 80 километри на час.
Според МВР, случајот е регистриран на 23 октомври во 12:05 часот на автопатот Гостивар–Тетово. Полициски службеници од Мобилната единица за безбедност на сообраќајот на патиштата ја измериле брзината со специјално полициско возило – пресретнувач.
Автомобилот со тетовски регистарски ознаки се движел со 114 километри на час над дозволената брзина.
Возачот е приведен поради сомнение за кривичното дело „безобѕирно управување со моторно возило“. Од МВР информираат дека се преземени соодветни мерки и против него ќе биде поведена постапка.
Министерството најавува продолжување на засилените сообраќајни контроли и апелира возачите да ги почитуваат ограничувањата на брзината и сообраќајните правила.
…
