Поради пад на температурите и замрзнати коловози, во изминатото деноноќие во северозападниот дел на земјата беа регистрирани бројни проблеми во сообраќајот, информира Центарот за управување со кризи (ЦУК).
Од Полициската станица Тетово биле пријавени четири сообраќајни незгоди со материјална штета, меѓу кои две на автопатот Тетово–Гостивар, вклучувајќи и една верижна незгода со 10 возила. По една незгода е евидентирана на локалниот пат Пирок–Боговиње и на патот Тетово–село Требош. Од Полициската станица Гостивар биле пријавени 15 сообраќајни незгоди, од кои на 10 е извршен увид, а за пет не бил побаран поради договор меѓу страните.
Граѓани од Тетово, Гостивар и околните населени места пријавувале замрзнати споредни и локални улици. Регионалниот центар за управување со кризи – Тетово стапил во контакт со општините Тетово, Гостивар и Желино, каде биле ангажирани фирми за зимско одржување и вршење посолување по приоритети. Во Гостивар, поради недоделен тендер, фирмата „Магнум Транс“ интервенирала доброволно за да се отстрани проблемот.
Од „Македонија пат“ информираат дека екипите од Тетово, Попова Шапка и Гостивар континуирано интервенираат на автопатите и регионалните патишта. Поради снежни врнежи, на правецот Лисец–Попова Шапка е воведена задолжителна зимска опрема.
По 22:30 часот не се пријавени нови инциденти. ЦУК апелира до возачите да бидат внимателни, да ја прилагодат брзината и задолжително да користат зимска опрема.
